Etter taxiforviklingane på togstasjonen var det fire fnisete nordmenn som snigla seg framover i ettermiddagstrafikken i Taipei på leiting etter nytt hotell. Me har for lengst gitt opp å uttala noko som helst på engelsk-kinesisk, så det vert nettsider og fingerspråk og kart når me skal finna fram. Heldigvis har me hamna hos ein hyggeleg taxisjåfør som leitar, satsar 50/50 i eit par lyskryss og til slutt ringer ein ven. Og vipps – så står me på gata utanfor eit heller lugubert bygg med spor av «Longstay hotel» på veggen. Det er berre å ta sekkane på ryggen, pressa oss inn i ein minimalistisk heis og ta turen opp til femte etasje (ekte femte – dette hotellet har faktisk fjerde etasje også!). Me kjem inn i ein heller komisk resepsjon med legoklossar! på veggane, ein heller forvirra resepsjonist og elles lite anna. Men som alltid i Taiwan – førehandsbestillinga vår er på plass (sjølv om ingen skjønnar at vår presentasjon som «Vikain» skal samsvara med «Vikane» på bookingen, desse innfødde kallar oss heller noko som liknar på «vichihing»).
Denne kvelden går me på vår fyrste «bookingsmell». Ikkje ein spesielt stor ein, men rommet er pitte lite, mørkt, har knapt vindauge og eit smalt og rart bad. Ikkje heilt som me trudde ut frå ratingen på www.hotels.com, men heilt OK. Me orkar i alle fall ikkje å bytte – for me har jo ikkje tenkt å vere der så lenge uansett! Så etter ein kjapp runde med klesbyte og kattevask, er me igjen klare for Taipei. Og no skal me jåla oss litt! Jentene i reisefølgjet har blinka ut ein neglestad og skal ha manikyr og gèl, han far skal få ein time fri etter at han har funnet ein middagsrestaurant utan nudlar.
Me hamna på Collor108, ein trong korridor inn frå gata og opp ei trapp. Der sat det fem damer og fiksa negler etter alle kunstens reglar. Me har aldri sett så fantasifulle og flott negler nokon sinne. Det var nesten litt flaut at me berre skulle ha ti einsfarga negler kvar! Så Vilde redda oss med å ta fire negler i kontrastfarge 😊 Men kjekt var det og flinke var dei! Så fekk det heller våga seg at dei estimerte 45 minutt me hadde gitt Geir blei til heile 90 minutt… Godt det ikkje tok endå lengre tid; Geir hadde vore og funnet ein restaurant han meinte kunne passa bra. Då han stolt viste fram staden han hadde funnet fekk han litt rare blikk frå oss jentene – det var jo same staden som me hadde ete sist me var i Taipei! Litt forsiktig spurte me om han ikkje kjente igjen døra og menyen… Det er godt me jentene har litt betre GPS og hukommelse enn vårt mannlege reisefølgje!
Me byrjar å bli litt lei av restaurantmat no, så neste morgon vart det brød, banan og cherrytomater til frukost før me tok t-banen til ein bydel nord i Taipei for å gå på museum.
Då Chiang Kai Shek rømte frå fastlandet, tok han med seg store delar av dei kinesiske kulturskattane. Mange av desse er i dag utstilt på National Palace Museum – som heldigvis viste seg å vera ope (me er framleis litt snurt over bomturen til National Museum of History for fjorten dagar sidan). Ein kjapp lunsj og me er klare med gratisbillettar for ungdomen og audioguide på øyrene. Som det nesten ikkje er mogeleg å høyra noko av! Over alt i museet står det skilt om å vera stille, og lokala er høgtidsame og flotte – men publikum? Det minnar meir om ein engelsk fotballarena enn eit museum. Det er så mykje prating, latter og roping at me etter kvart brukar audioguiden som middel til å halda lydar UTE enn å få kunnskap INN! Så der går me mellom eldgamle og nyare kinesiske kunstskattar og lengtar tilbake til ro og fred på austkysten. Det er mykje flott – og mykje rart. Og mykje me ikkje skjønnar. Det er fleire rom med skriftrullar med kinesiske teikn – og det er rart og sjå kor forskjellige teikna kan vera – det er nesten som at du ser dialektar i pennestroka! Nett då angrar me litt på at me ikkje har leigd ein guide som kunne ha fortalt oss litt om det!
Men me tenker at det får vera nok høgkultur for i dag. Me set nasen mot rutebussen som skal ta oss vidare til Shilin Night Marknad for ein matbit og litt lågkultur. Det viser seg at me ikkje veit heilt kva me går til… Me hadde jo vore på nattmarknad i Hualien og trudde me skulle på noko liknande. Men her kraup liksom nattmarknaden inn på oss… Me gjekk nedover smale gater mot der me trudde me skulle finna eit marknadsområde – og etter kvart som det vart tettare og tettare med folk skjøna me at me var midt oppe i det! Shilin night marked er eit område med smale smug med butikkar, boder og små matvogner. Og tett i tett i tett med folk. Omtrent som køen ut av Koengen etter ein Bruce Springsteen-konsert! Over alt er det folk som handlar, pratar, drikk og et. Og folks om prøver å få merksemd for det dei har å tilby på dei mest kreative vis – megafonar, blinkande lys, hyl og kostymer. Vår plan om å finna ein stad å sitja og eta ein god middag vert bytta ut med å siga sakte med straumen rundt i området og grabbe til oss ei skål med fritert kylling her, nokre glaserte jordbær der, fem steikte vaktelegg på pinne, ei flaske øl på eit hjørne og friterte pannekaker frå ei bu. Me byrjar å tenkje at det kanskje var like greitt at me ikkje fekk ordna visum til Kina – det bur berre rundt 22 millionar i Taiwan, men me begynner å kjenna på at det er litt mykje folk alle vegar. Ein dag og to på Hardangervidda verkar med eitt veldig freistande!
Men det skal ikkje så mykje til før me er i lodd igjen! Ei god natt søvn på det pitte vetle hotellrommet vårt, ein sein og god vestleg brunch, eit kjapt hotellbytte og litt shopping, og me er klare igjen. Planen for siste dag i Taipei er å få med oss eit par tempel og litt fotmassasje samt lunsj på ein ny temarestaurant – denne gongen «Alice is coming». Så me traskar av garde, svippar innom den eldste offentlege bygningen i byen for litt historieoppdatering, drikk te og kaffi på ein lokal kaffibar og troppar opp i wonderland hos Alice. Bare for å få beskjed om at her må du reservere bord veker på førehand! Men me rekk å sjå at lokalet er pynta nett som i filmen og at alle sit og et i store tekoppar. Og at servitørane har sånne fjollete kjolar på seg. Det hadde vore stas med «Afternoon tea» der – men me fekk jo uansett sett det!
Etter kvart finn med også fram til Longshan Temple. Eit flott, tradisjonelt tempelbygg med dragehovud på taket, masse glitter, røykelse og gull – inneklemt mellom høghus midt i Taipei. Igjen vert me forundra over kor integrert i kvardagen den buddhistiske religionen er. Folk kjem og ber, mediterar og legg att offergåver midt innimellom masande turistar med klikkande kamera, selfiestenger og påtrengjande gruppeposeringar. Og ingen ser ut til å bry seg. Imponerande av dei truande og litt flaut for oss som trengjer oss på…
Men NO må me slappa av! Det som måtte vera av gudar eller anna der oppe i himmelen har funnet ut at det er på tide med ein ny vask av byen, så me søkjer tilflukt på ein massasjestad. Geir vel ryggmassasje og vert plassert inne i eit lite rom uner trappa (nett som Harry Potter), me tre andre vert plassert i kvar vår gode stol med fotbad medan me ventar på ein time med fotmassasje. Som viser seg å ver meir sadomassasje! Det gjer vondt! Sindige nordmenn er jo oppdratt til å smile og seie takk, så me sit stille og lir ei heil stund. Så prøver me med nokre små hint om at det kanskje ikkje treng å strykast så hardt, men no verkar det som om språkutfordringane også har råka kroppsspråket, for trass i at me trekk til oss beina, ristar på hovudet, ynkar oss og ber om nåde, durar dei berre på. Så det vert ein time med smerter – og etter kvart ganske så hysterisk latter rett og slett for å avleda merksemda frå det som skjer frå kneet og ned. Særleg går dette ut over underteikna som har fått ein massør som ser ut som – og oppfører seg som – ein krysning mellom Bruce Willis og Bruce Lee. Inne under trappa går det hardt ut over ryggen til Geir også, men han trøystar seg med at det er god stemning ute ved fotbadet – han høyrer jo berre at me ler!
Endeleg er me ferdige og kan ikkje komme oss raskt nok ut av lokalet. Snakkar om tortur! Me er stive og ømme, og det er vondt berre å trø litt hardt på gata! Skal ikkje massasje vera godt og avslappande?!? Me avgjer kjapt at me må trøysta oss sjølve med litt god mat – og smyg oss usett inn på TGI Fridays for burger og pommes frites. Ikkje sei det til nokon – det er flaut at me vel ein slik restaurant når me er på tur, men abstinensen etter salt og noko med tyggemotstand er blitt for stor!
I morgon tidleg pakkar me sekkane, tek ein taxi til flyplassen og seier takk til Taiwan for denne gong. Landet har teke oss med storm, og me er veldig sikre på at me må tilbake hit igjen – særleg freistar det med fotturar i høgfjellet. Det er berre det at det er så mange, mange andre stader rundt om i verda som lokkar! Så no; neste stopp Indonesia!